И претседателот на државата Иванов, одбра да се вклучи во групата која ги дели новинарите на предавници и патриоти.
,,Кога сте во спор секој настојува својата страна да ја покрие со аргументи. Така и Грција ќе излезе со многу аргументи. Како што слушам многу ќе бидат со изјави на наши новинари што даваат изјави што ширеле шпекулации и што давале погрешни информации кои грчката страна ги користи во нивна корист...“ вели меѓу другото Претседателот на државата Ѓорге Иванов.
Здружението на новинарите на Македонија бара итен одговор од Претседателот на Македонија каде и како има „слушнато“ дека Грција ќе се брани со изјави на македонските новинари.
Инсистираме да не се даваат паушани изјави за македонските новинари, а посебно од официјални лица, па дури од страна на највисоки авторитети. Ова само придонесува кон забуна и недоверба воопшто меѓу граѓаните во Македонија, како за состојбите во државата, така и за состојбата во новинарството. Сметаме дека ова е обид за дисциплинирање на македонското новинарство. Новинарите не работат во ничија полза, туку врз основа на сознанија и факти и имаат право да ги коментираат политичките процеси.
Здружението на новинарите на Македонија е разочарано што ваквиот удар на претседателот врз новинарите доаѓа по кратко време откако на новогодишното дружење со нив изјави дека ќе му биде приоритет во 2010 година да ги подобри состојбите во сферата на слободата во Македонија, бидејќи тој беше незадоволен од годишниот извештај на Фридом Хаус.
Здружението на новинарите на Македонија ги повикува сите новинари и медиуми да заземат став и најостро да ја осудат ваквата изјава на Претседателот и да ја дефинираат уредувачката политика кога се во прашање ваквите крајно несериозни и не државнички испади на носители на јавни функции.
