Здружението на новинарите на Македонија, во соработка со ОБСЕ и Здружението на судиите на Република Македонија организираше дебати во Скопје, за скопскиот, кумановскиот и тетовскиот регион која се оддржа на 03.12.2009 година и во Битола за битолскиот, струмичкиот, штипскиот и охридскиот регион, која се оддржа на 05.12.2009 година.
Судиите и новинарите на овие две дебати се обидоа да дадат одговори на повеќе дилеми, како на пример дали можат судството и медиумите да најдат заеднички јазик и наместо судиите и новинарите да бидат непријатели да станат партнери во потрагата по вистината, но и во потребата за обезбедување професионално и објективно известување за судските процеси. Како да се надминат бариерите во меѓусебната комуникација, што често е обременета од нетранспарентност, страв и политички влијанија?
И двете страни се согласија дека има потреба од поголема отвореност на судството, подобар проток на информации, но и на попрофесионален однос на носителите на двете професии. Новинарите им забележаа на судиите дека се затворени, се кријат зад крутите законски норми, дури и оти се одмазнички настроени во судските процеси каде што тие се јавуваат како тужена страна.
Аргументите на судиите, пак, беа дека не може да излегуваат од она што го предвидел законодавецот. Потсетуваа дека треба да се имаат предвид специфичноста и сензибилноста на она што го работат, а се пожалија и на некоректниот однос на одредени новинари, кои од најразлични интереси знаат да ги извртат фактите. Новинарите укажаа и на затвореноста на повисоките судови, особено на Врховниот суд, кој иако е највисока судска власт, сепак, целосно е затворен. Негативни критики доби и Здружението на судии, чиј претседател, иако уредно поканет, не се појави на средбата.
Дел од судиите присутни на дебатата не се согласија со оцените дека „новинарите се сатанизирани и кон нив се постапува инквизорски и одмазднички кога ќе се јават во улога на тужена страна“.
Судиите и новинарите се согласија дека е потребно и натаму да се работи на подобрување на комуникацијата, која е во интерес на двете професии.
Од овие дебати треба да произлезе и прирачник кој ќе придонесе во поквалитетното информирање на новинарите од судниците.
